Замын-Үүдийн боомтоор цагт 900 зорчигч, зорчигч тээврийн 100 хэрэгсэл нэвтэрч байсан бол өнөөдөр 5000 зорчигч, зорчигч тээврийн 500 хэрэгсэл нэвтэрч, өдөрт 20 мянган хүнд үйлчлэх хүчин чадалтай болж, мөн АВТОЗАМЫН АЧААНЫ ХЭСЭГ 24 цагаар ажиллах боломж бүрдэж байна.

Тус боомтын давуу талууд : 

Төслийн хүрээнд зорчигч тээврийн 30, ачаа тээврийн 28 барилга, дэд бүтэц, ногоон байгууламж баригдсан. Түүнчлэн шуурхай удирдлагын төвтэй холбогдсон орчин үеийн теле хяналтын систем бүхий тээврийн хэрэгслийг автоматаар бүртгэх ухаалаг гарцууд болон өндөр хүчин чадлын рентген, тоног төхөөрөмжүүд суурилагдсан.

Боомтын шинэчлэлийн хүрээнд зорчигч тээврийн импортын замыг 8-аас 20 эгнээ болгож, экспортын замыг 4-өөс 24 эгнээ болгож, ачаа тээврийн импортын замыг 3-аас 23 эгнээ болгож, экспортын замыг 2-оос 5 эгнээ болгож тус тус нэмэгдүүллээ.

Ингэснээр нийт талбай 8 дахин нэмэгдэж, нэг өдрийн зорчигч нэвтрүүлэх хүчин чадал 4 дахин, том оврын ачаа тээврийн хэрэгсэл нэвтрүүлэх хүчин чадал 3 дахин, суудлын тээврийн хэрэгсэл нэвтрүүлэх хүчин чадал 7 дахин нэмэгдсэн бөгөөд зорчигч, тээврийн хэрэгсэл хилийн боомтоор түргэн шуурхай нэвтрэх, ая тухтай үйлчлүүлэх боломж бүрдэж байна.

Замын-Үүд боомт нь Монгол Улсын гадаад худалдаа, эдийн засгийн хөгжилд томоохон нөлөөтэй бөгөөд нийт гадаад худалдааны 28 хувь, импортын 42 хувь, экспортын 21 хувь дамжин өнгөрдөг боомт юм.