Монгол Улсын Ерөнхий сайд Л.Оюун-Эрдэнэ, Монгол Улсын сайд, Боомтын сэргэлтийн үндэсний хорооны дарга Х.Булгантуяа, Сангийн сайд Б.Жавхлан нар Гаалийн ерөнхий газрын үйл ажиллагаатай танилцаж, гаалийн албан хаагчидтай уулзлаа.

Ерөнхий сайд Л.Оюун-Эрдэнэ эхлээд гаалийн байгууллагын шинээр ашиглалтад оруулсан “Шуурхай удирдлагын төв”-ийн үйл ажиллагаатай танилцлаа. Энэ төвд харьяа гаалийн 18 газар хороо, 29 боомт, 115 гаалийн хяналтын бүсийн камерийн хяналтын системийг холбож хяналтыг нэг цаг мөчид Гаалийн ерөнхий газар болон тухайн гаалийн газар хороод зэрэг хэрэгжүүлэх боломжийг бүрдүүлсэн байна. Дараа нь “Гаалийн шинэчлэл”-ийн хүрээнд шинээр ашиглалтад орсон Гаалийн төв лабораторийн үйл ажиллагаатай танилцсан юм. Гаалийн байгууллага гаалийн төв болон салбар лабораторийн зориулалтын барилгыг ашиглалтад оруулж өндөр хүчин чадал бүхий шинжилгээний 164 тоног төхөөрөмжийг сурилуулснаар шинжилгээнд хамрагдсан дээжийн тоо 2,5 дахин нэмэгдэж, магадлан шинжилгээнд хамруулах хугацааг 2-3 хоногоор бууруулжээ. Мөн нүүрс, хүдэр, баяжмал, газрын тосны бүтээгдэхүүн зэрэг 3 төрлийн 19 нэрийн бараанд 35 үзүүлэлтээр БНХАУ -ын итгэмжлэлийг авсан нь гадаад худалдаа эрхлэгчдэд зардал, цаг хугацааг хэмнэх боломжийг бүрдүүлсэн байна.

Цар тахал, дайны нөхцөл байдлаас шалтгаалсан Монгол Улсын эдийн засгийн хүндрэлийг даван туулахад гаалийн байгууллагийн албан хаагчид та бүхний нөр их хөдөлмөр, хичээл зүтгэл чухал үүрэгтэй байсныг Ерөнхий сайд Л.Оюун-Эрдэнэ онцлоод гаалийн байгууллагын боомтын шинэчлэл, цахим шинэчлэлийн ажлууд хэрэгжиж, ахиц гарсанд гаалийн албан хаагчидад талархал илэрхийлж, амжилт хүслээ.